السلام عليكم ✋ لو لا قدر الله شوفت حد قدامك بيتحرق سواء بمية سخنة أو مية نار أو أنبوبة فدي tips ضروري نبقى عارفينها:
1️⃣ شيل مصدر الحرق ده: وليكن مثلا أنبوبة غاز وابعده عنها ولو هو بيجري مثلا حاول بشتى الطرق إنك توقفه وتطفي النار دي بتراب أو رمل أو بطانية ولو مقدرتش توقفه وقعه 🏃♂️❌.. المهم تطفي النار أول حاجة ضروري جدا علشان تقلل المشاكل اللي ممكن تحصل بعد كدة. 🔥
2️⃣الهدوم والإكسسوارات: شيل اي هدوم لابسها لأنه حتي لو الشخص كان اتطفي فهي ما زالت مصدر حرارة وعمالة بتزود من الحرق بتاع الشخص ده (خد بالك تشيل الهدوم اللي قادر تشيلها انما لو الهدوم لازقة سيبها زي ما هي) 👕.. وشيل أي اكسسوارات لابسها (خواتم أو ساعة) لأن بيحصل تورم وممكن الاكسسوارات دي تضغط على الأوعية الدموية فتوقف الدورة الدموية في الجزء المحروق ده. 💍⌚
3️⃣التغطية: غطي الحرق بشاش أو أي هدوم قطن لحد ما يتنقل للمستشفى (هدوم تانية غير اللي شيلناها في الأول). 🩹
5️⃣المية الجارية: لو الحرق ده بمادة كيميائة زي مثلا ماية نار حاول تخفف المادة دي بماية جارية، أو حتى لو حرق بمية مغلية مثلا حطه برضو تحت مية جارية علشان تبرد الحرق وتقلل درجة حرارته. 💧🚿
6️⃣التنفس والأعراض: أثناء نقل المريض ده لو انت معاه اتأكد طول الوقت إن مفيش أعراض غريبة طرئت عليه والأهم إنك تتأكد إنه بيتنفس كويس لحد ما يوصل المستشفى. 🚑🫁
وبس كدة ... دي خطوات عملية حسيت إنها ممكن تفيد أي حد لو أتحط في موقف وشاف حد بيتحرق، والأهم والله من كل النصايح والخطوات دي إنك تكون مبادر وحط في دماغك دايما "ومن أحياها فكأنما أحيا الناس جميعًا". ❤️ ربنا يحافظ على الجميع يارب ويكفينا شر الأقدار.