𝗣𝗧 𝗩𝗶𝗯𝗲𝘀 | 𝗣𝗵𝘆𝘀𝗶𝗰𝗮𝗹 𝗧𝗵𝗲𝗿𝗮𝗽𝘆
أسئلة شائعة من الناس اللي داخلة أولى السنادي :

س/هل أبدا أذاكر ف المنهج بتاع سنة أولى من دلوقت ؟
ج/لأ ، لأسباب كتير من أهمها انك مش هتفهم حاجة لأنه لازم تسمع المحاضرة من دكتور مثلا لأن بيكون في طريقة مختلفة ف البداية عشان تتعود على الشرح وبناءً على كدة لو بدأت لوحدك هتحس بالاحباط وإن ده مش مكانك وكدة + إنك لسة طالع من سنة مدعكة حرفيًا فاهدأ واستمتع بإجازتك دلوقت ...

س/هل أبدأ أذاكر مصطلحات طبية ؟
ج/ مش لازم برضو😂 ... كدة كدة ف أولى بيكون عندك مادة كاملة للمصطلحات الطبية تستفيض فيها مع نفسك أثناء الدراسة

س/أومال أبدا أذاكر اي أو أستعد إزاي ؟
ج/شوف فديوهات الانترودكشن بتاعت الأناتومي لأنه مادة مهمة وبرضو علشان تبقى داخل واخد فكرة عنه
عندك ڤيديوهات د/ سامح غازي تحفة وهتفهمك براحة وهتخليك نفسيًا داخل الكلية بحاجات أنت عارفها واقرأ عن المواد اللي عندك وعن أقسام الكلية ونظام الـ gpa وكدة ... كل دي حاجات تعتبر من جُملة استعداداتك للكلية

س/ خايف من إن الدراسة كلها هتكون بالإنجلش وانا كنت تعليم عربي طول عمري ومستوايا ف الإنجلش متدني؟
ج/ماتقلقش من حاجة زي دي أبدًا ... في البداية مثلا اول شهر كدة هتفضل تترجم صفحة صفحة وهتبقى بتذاكر ببطء وبصعوبة بس بعد كدة هتلاقي الكلمات بتتكرر وهتوصل على آخر سنة أولى إنك في حاجات عارفها إنجلش مش عارفها عربي
وبالمناسبة الانجليزي ف الكلية مش بيعتمد على القواعد والكلمات اللي انت حافظها لأن الأغلب مصطلحات طبية جديدة عليك وهي لاتينية أصلا.. فالخلاصة مستواك في الإنجلش قبل الكلية ملهوش علاقة ...

بالتوفيق يا دكاترة المستقبل♥️💪
Channal
Esraa Ragab, edited  

Comments

Be the first to add a comment