‏بعض الصفات الشخصية تكون موجودة بشكل دائم مع الشخص مهما حاول يكتشف طرق وحلول لتغييرها ما تتغير ابد وقد تكون بسبب عوامل وراثية او اشياء تعرض لها وهو صغير واحيانًا حتى تكون الصفات الموجودة ذي - بدون سبب واضح -. ‏فيه قاعدة مهمة انه اذا كان من المستحيل انك تقدر تغير شيء او تبدله مهما كان هذا الشيء ( ظروف، مصاعب، او صفات شخصية..الخ ) فالطريقة الوحيدة الامثل للتعامل معها انك تتقبل وجودها في حياتك حتى لو كانت سيئة لان شعورك بانك ما تتقبلها وبنفس الوقت ما تقدر تغيرها بيكون شعور اسوء.

‏بكل الحالتين هي فيك فيك.
فمثلًا وانا اطلب من مطعم شفت شخص ( الله يعافيه ويعافينا ) عنده اربع اصابع، بالرغم من هذا كان هو الكاشير لعدة سنوات بهذا المطعم وهو اللي يستلم الطلبات من كل شخص، بمعنى انه يوميًا يقابل مئات الاشخاص ومع ذلك ما تحسس وخذ وظيفة يبعد فيها عن رؤية الناس له. ‏وهذا يبين الثقة العالية والتقبل الكبير اللي عند الشخص ذا، احيانا عدم تقبلك لصفة معينة فيك وتحسسك منها يخليك تخسر كثير، فلو كان الشخص هذا مو متقبل هذا الشيء ما كان توظف وممكن ما لقى مكان يتوظف فيه وممكن كان اصبح عالة على اهله وما بيعتمد على نفسه، في غالب الاحيان تقبلك لصفاتك ضروري.

‏في آخر نقطة بتكلم عنها بذا الثريد اللي هي ان احيانا تعطي لنفسك حلول وما تنفع ومباشرة تصدر الحكم ان هذي الصفة ما تقدر تغيرها وهذا غلط،
احيانا تكون حلولك غلط او شفتها من مصادر مو موثوقة او تطبيقك لها غلط او اشياء كثير قد تجعل الحل يفشل مو لان الصفة دائمة فيك.. لان ما قدرت تجيب الحل، ‏قبل ما تصدر الحكم اللي اذا كان مصيري ممكن يغير حياتك كلها، اختبره زين.. قارن مشكلتك مثلًا مع شخص ما عنده ذي المشكلة وحاول تشوف الفوارق بينكم، لا تشوف مصدر واحد لحل مشكلتك احيانًا يكون الحل بمصادر ثانية والنت مليان، التدقيق بمثل هذي الامور ضروري جدًا.