Жорий йилнинг 14 июль куни «Банкир кундалиги» телеграм канали орқали “Ўзсаноатқурилишбанк” АТБ Навоий минтақавий филиали мижозининг ойлик “Иш ҳақи” картасидан онлайн кредитга 480 минг сўм ечилганидан сўнг, унинг ҳисоби (картаси)да яна 61 минг сўм қолдиқ ўрнига 412 минг сўм қарз кўрсатганлиги, пластик картасига бошқа картадан пул ўтказса ҳам минусда қайтариб юбораётганлиги ҳақида мурожаати эълон қилинди.

Мазкур ҳолат Банк мутасаддилари томонидан ўрганиб чиқилганида қуйидагилар маълум бўлди:

Ҳақиқатан ҳам, 2021 йил 2 июль куни Банк мижози Х.Ўнинг Humo картасидан кредит фоизи эрталаб соат 8.40да 481 811,42 сўм автоматик тарзда ечиб олинган. Шундан сўнг, карта эгасининг турмуш ўртоғи картадаги пулни банкомат (SQB’га тегишли бўлмаган) орқали нақдламоқчи бўлганда пул еча олмаган.

Банк мутахассислари томонидан фуқаро Х.Ўга тегишли карта ҳисобини ҳам ИАБС тизими, ҳам Процессинг маркази орқали текширилганида эса мижоз картаси қолдиғи плюс (муайян суммадаги маблағи билан)да турганлиги келиб чиқди.

Буни мижоз Х.Ў ҳам ўз ҳисобини Click иловаси орқали текшириб, тасдиқлади.

Шу ўринда, мижозларимизга банк хизматлари ҳамда филиаллардаги хизмат кўрсатиш жараёнлари билан боғлиқ саволлар ёки юқоридаги каби ҳолатлар юзага келганда Банкнинг 24/7 режимида ишловчи “Call markaz”ига (+998 71 200-43-43, 0 800 120-77-77) қўнғироқ қилиши ёки телеграм орқали @sqbsupport ботига ёзма мурожаат этишларини сўраб қоламиз.