حابب أقولك على نصيحتين غاليين جدا هيساعدوك أثناء حفظ القرآن بشكل ملحوظ وحابب تعرفهم عشان أختصر عليك طريق طويل.
الأولى:
كثرة سماعك للقرآن في جوف الليل،
أثناء المواصلات، أثناء العمل، أثناء وقت الراحة بين المحاضرات، أثناء حزنك، أثناء فرحتك، قبيل نومك بعد يوم شاق طويل، والله العظيم كل السنين اللي قعدت تسمع فيها قرآن مش بتضيع هباءا
على سبيل المثال هتجد إن غالبية الشعب الطيب دا حافظ سورة يوسف بطلاقة بسبب كثرة سماع السورة لا أكثر.
فالشاهد من الأمر إنك لو من الناس اللي بتسمع قرآن كتير ولسه ماحفظتش القرآن فأنا حابب أبشرك إنك بأمر الله هتجد سهولة ويسر في حفظ القرآن
وياريت تتوكل على الله وتبدأ تحفظ في تلك الأيام المباركة وكفاك تسويفا.
الثانية:
لو حابب إن يكون حفظك للقرآن متين لا ينسى فأنا عاوزك تشتري كتاب جميل ومبسط لتفسير القرآن بحيث إنك قبل ماتحفظ صفحة القرآن اللي عليك تفهمها كويس وياسلام بقى لو تروح تشرحها لصديق ليك وبالمرة تاخد ثواب عظيم
على سبيل المثال قبل ماتروح المسجد عشان تسمع للشيخ السورة وانت قاعد بتحفظ.. افتح مصحفين المصحف الاول تقرأ منه والتاني للتفسير وتبدأ تشرح لنفسك بهدوء وبروقان فلما تقابلك آية زي دي: { وَكَم مِّن قَرْيَـةٍ أَهْلَكْنَٰـهَا فَجَـآءَهَا بَأْسُـنَا بَيَٰتًا أَوْ هُمْ قَآئِلُـونَ}
اقف شوية وافهمها.. ربنا بيقول هنا:
شوف كام قرية اهلكناها وجاءها العذاب "بياتا" يعني بالليل او "هم قائلون" يعني وقت القيلولة.. الظهر كدا
النصيحتين دول كافيين جدا وهيفرقوا معاك.. منهم نصيحة سهلة ويسيرة وهي الأولى ومنهم نصيحة هتاخد جهد ووقت ولكن هتجد فيها لذة وهي التانية
واللذة هنا إنك تكون حافظ للقرآن وكمان فاهم ومدرك لمعانيه بحيث يكون كتاب الله مرسخ في الذاكرة بأمر الله.
لما تموت وتبعث.. لازم يكون عندك علم إن يوم القيامة يقال لقارئ القرآن إقرأ وإرتق ورتل كما كنت ترتل في الدنيا، فإن منزلتك عند آخر آية تقرؤها
فأتمنى دايما من ربنا إنه يجعلك من حفظة كتاب الله المتقنين لأحكامه والعاملين به وأن يجعلنا من أهل القرآن ويجمعنا سويا به في الجنة
❤️