- جربتها ونفعت .
= هى ايه دى؟

- تقولى خمستلاف مرة (يارزاق يارزاق) .. سبحان العاطي الوهاب!! كان على متأخر إيجار ودفعته، وفلوس الجمعية ومصاريف مدارس العيال ماكنتش عارفة أدبرها ازاى، لحد ماسمعت سيدنا الشيخ بيقول الوصفة دى، وانا كل يوم بعد المغرب اقعد أقول يارزاق يارزاق لحد ما ربنا فرجها من أوسع الأبواب.
= يابنتى دى بدعة الله يهديكى.

- إيه البدعة اللى فيها؟ هو انا لما اقول يارزاق فيها ايه حرام ؟
= الحرام مش فى الدعاء باسم الله (الرزاق) لكن تكراره بالكيفية دى بدعة؛ لأن العبادات بنعملها زى مااتعلمناها من النبى صلى الله عليه وسلم، مينفعش تخترع فيها ونزود وننقص حاجات من عندنا.

- مش فاهمة!!
= طب صلى ع الحبيب.

- عليه أفضل الصلاة والسلام .
= ربنا بعت لنا النبى صلى الله عليه وسلم عشان يعلمنا ازاى نعبد الله، وده شرط دخول الجنة.
الأصل إن البنى آدم مفطور على حب الله، والرغبة فى التقرب إليه بالعبادة، لكن إيه الفرق بيننا وبين اليهود والنصارى مثلا؟ أو بيننا وبين الروافض والصوفية ؟ هم كمان بيعبدوا ربنا؛ لكن بيعبدوه بهواهم، اخترعوا عبادات عبدوه بيها، لكن احنا بنعبد ربنا زى النبى صلى الله عليه وسلم ما علمنا.

-طب قوليلى أمثلة.
= فى الصلاة مثلا: قال 《صلوا كما رأيتمونى أصلى》
طب ينفع نصلى لبيت المقدس مثلا بدل مانتوجه للكعبة ؟ طبعا لأ وصلاتى هتبقى باطلة.

طب ينفع نصلى الظهر 3 ركعات والمغرب 4 ركعات ؟!!
مينفعش..مع أننا مش بنعمل حاجة حرام احنا بنصلى.

- تمام . إيه كمان؟
= وفى الحج مثلا: النبى صلى الله عليه وسلم قال 《خذوا عنى مناسككم》 طب ايه رأيك لو حد راح حج فى رمضان،  وراح وقف على عرفات ورمى الجمرات وعمل المناسك كلها فى رمضان فى الرواقة.

- ده متخلف.
= تفتكرى ربنا يتقبل حجه؟!
- استحالة طبعا ده تعبه راح ع الفاضى.
= تمام عشان راح حج فى زمن غير زمن العبادة اللى حدده النبى صلى الله عليه وسلم، يعنى المفروض يحج فى 8-13 ذى الحجة فلو عمل كل المناسك فى زمن غير ده لم يقبل منه.

- الدنيا ابتدت تنور الحمد لله.
= الحمد لله. بالنسبة للدعاء والأذكار؛ النبى صلى الله عليه وسلم حدد لنا أعداد وكيفية فى الذكر والدعاء لازم نلتزم بيها عشان تبقى عبادة صحيحة نؤجر عليها، وتلاقيها فى ميزان حسناتك يوم القيامة؛ ما تبقاش سراب وهباء منثورا.

- ازاى بقى؟
= على سبيل المثال: التعبد بأسماء الله الحسنى يكون بسؤال الله تعالى بأسمائه، وليس بذكره بها .
هضرب لك مثال يقرب الصورة شوية  انتى ابنك اسمه ايه؟
- اسمه محمد.
= ماشاء الله ربنا يحفظه . طب تخيلى مثلا لو انتى قعدتى تقولى يامحمد يامحمد يامحمد ايه اللى هيحصل؟ هتلاقى محمد جاى يقولك عايزة حاجة ياأمى؟ سمعتك بتندهى على!
يبقى المنطقى انك تقولى له هات لى كوباية مية مثلا!

ولله المثل الأعلى لما تقولى يارزاق! يبقى انتى بتنادى الله عز وجل،  يبقى المناسب إنك تسأليه تقولى مثلا (يارزاق ارزقنى يارزاق أشكو إليك ضيق حالى فوسع على وانت خير الرازقين يامن لا تنفد خزائنه صب على الخير صبا صبا ولا تجعل عيشى كدا كدا) لكن لما حد يقول يارزاق يارحيم ياغفور ويفضل يكرر فيها من غير مايسئل الله كده بقت بدعة مردودة على صاحبها، وليس ذكرا يؤجر عليه.

وأما التكرار فيكون فى ذكر اسم الله مع تسبيحه وتحميده وتهليله وتكبيره واستغفاره ..
يعنى ممكن تقولى سبحان الله الحمد لله لا إله إلا الله الله أكبر لا حول ولا قوة إلا بالله أستغفر الله كام ألف مرة على قد ربنا ما يقدرك مفيش مشاكل وتبقى مأجورة أن شاء الله وربنا يذكرك كما ذكرتيه؛ لأن الصفة دى فى الذكر سنها لنا النبي صلى الله عليه وسلم ولم يقيد بعدد؛ فنجتهد فى الزيادة فيها إلى ماشاء الله .

- تمام كده. ربنا يرزقنا اتباع السنة.
= آمين . يبقى أى عبادة أو عمل عشان يكون صالح وتتقربى بيه لربنا لازم يوافق السنة فى ست حاجات :
1- السبب.
يعنى مثلا بلوغ المال النصاب وحلول الحول سبب شرعى لوجوب الزكاة.

2-الجنس.
مثلا الأضحية لابد أن تكون من جنس بهيمة الأنعام؛ فلا تصح من الدواجن أو بتوزيع اللحم المذبوح.

3- الزمان.
زى اللى بيعتقد فضل الصيام فى أول رجب؛ فالصيام مشروع، لكن لما حد له زمانا لم يرد فى السنة صار بدعة.

4-المكان.
تقول لك الدعاء عند قبر السيدة نفيسة مستجاب، والدعاء عبادة عظيمة، لكن لما كان المكان هنا -القبر- قد نهى النبى صلى الله عليه وسلم عن العبادات عنده؛ صار الدعاء عند القبر بدعة.

5-الكيفية.
على سبيل المثال رفع البصر للسماء فى الصلاة بعد الرفع من الركوع، فهذه الكيفية منهى عنها فى السنة.

6- المقدار.
زى عدية ياسين تقرأ بأعداد معينة لتفريج الكربات وقضاء الحاجات؛ فتحديد العدد مخالف للسنة.

وكذلك أى مخالفة فى حاجة من الستة دول، تجعل العمل بدعة مردودة يعاقب صاحبها عليها، يبقى مينفعش اقول (جربتها ونفعت) عشان العمل الصالح بالاتباع وليس بالتجارب، وبقدر حبك لله يكون اتباعك لخليل الله صلى الله عليه وسلم .
#قَانِتَاتٍ_تائبات