👉የዓመቱ ወቅቶችና የሪል እስቴት ገበያ

🏢እንደማንኛውም የምርት ገበያ የሪል እስቴት ግብይትም የወቅቶች መፈራረቅ ተጽዕኗቸው ቀላል አይደለም።

ወቅቶች በገበያው ላይ ያላቸውን ተጽዕኖ መረዳት ለሻጭም ለገዢም ውሳኔ ለመስጠት ለዝግጅትም ይረዳቸዋልና ይህንን በዘርፉ የላቀ ልምድ ያላቸው ሀገራት ላይ ያሉ የሪል እስቴት ማህበራትና የሽያጭ ድርጅቶችን ጥናት ተመልክቶ የተሰራ ጽሁፍን ከሀገራችን ወቅቶች ጋር አዛምጄ እንደሚከተለው በአጭሩ ለማቅረብ ሞክሬያለሁ።  

🌨🌨የክረምት ወቅት

ከሰኔ 26 እስከ መስከረም 25 ያለው ወቅት ሲሆን የአየሩ መቀዝቀዝና ዝናባማ መሆን የግንባታ ሳይቶችን ጭቃማ ማድረጉ ተደማምሮበት የቤት ገዢዎች ለግዢ ተነሳስተው ዞረው ጎብኝተው መርጠው ለመግዛትና ተደጋጋሚ መመላለስ የሚያስፈልገውን የግብይት ሂደት ለማካሄድ ተነሳሽነት ማጣትን ስለሚፈጥር የሀገራችን የክረምት ወቅት በተለይ በመገንባት ላይ ላሉ ሳይቶች ጎብኚና ገዢ ለማግኘት ይቸገራሉ።

በተጨማሪም የሀገራችን ኢኮኖሚ ግብርና መር ከመሆኑ ጋር ተያይዞ የቢዝነስ እንቅስቃሴው በክረምት ወቅት ስለሚቀዛቀዝና  የሀገራችን የክረምት ወቅት አብዛኛው የንግዱ ማህበረሰብ ዓመታዊ  ግብር የሚገብርበት ወቅትም በመሆኑ ቀልቡን ሰብስቦ ገንዘብ መድቦ ለቤት ግብይት የሚወጣ ነጋዴ ጥቂት ነውና የክረምት ወር ለሪል እስቴት ግብይት ቀዝቃዛ የሚባል ወቅት ነው።

ይህ የክረምት ወቅት አልሚዎችና አገበያዮች ጎብኚና ገዢ የሚቀንስባቸውና በዚሁ ምክንያት ዋጋ የሚቀንሱበት ወቅት ሲሆን ነገር ግን ለቤት ገዢዎች ጥሩ ቅናሽ የሚያገኙበት ነቅተው ለሚገዙ ቤት ገዢዎች በቅናሽ ለመግዛት አመቺ ወቅት ነው።

💫የመጸው ወቅት

ከመስከረም መጨረሻ እስከ ታህሳስ መጨረሻ ያለው ሲሆን እንደ ሁሉም የንግድ እንቅስቃሴ የሪል እስቴት ግብይትም መነቃቃት የሚታይበት ወቅት ነው።

ይህ ወቅት ከክረምት ወቅት የተሻለ ለመጎብኘት የተመቸ ነገር ግን ለግዢ ለውሳኔ ቀጣይ ወቅቶችን የሚያማትር ዕጩ ገዢ የሚገኝበት ነው።

🌟የበጋ ወቅት

ከታህሳስ መጨረሻ እስከ መጋቢት ወር መጨረሻ ጠቅላላ የሀገራችን የንግድ እንቅስቃሴ የሚሟሟቅበት አየሩም ሞቃታማ የሚሆንበት ሳይቶችን ተዟዙሮ ለመጎብኘትም ሆነ ጉዳይ ለማስፈጸም ለመንቀሳቀስ የሚያበረታታ በመሆኑ አልሚዎችና የሽያጭ ባለሙያዎች ከሌሎች ወቅቶች የተሻለ ጎብኚዎችና ገዢዎች የሚያገኙበት ወቅት ነው።

🔰የጸደይ ወቅት (የበልግ ወቅት)

ይህ ወቅት በበጋና በክረምት መካከል የሆነ (ከመጋቢት መጨረሻ እስከ ሰኔ መጨረሻ) የሌሎች ወቅቶችን መለያዎች አስተባብሮ የያዘ ነው። ጸሀይ፣የበልግ ዝናብ ፣ የበልግ ምርት፣ ለክረምት ዝግጅት እርሻ ...የንግዱም ስራ ያንኑ የሚከተል ነው ። በርካታ ተጀምረው የነበሩ የቤት ግዢ ውሳኔዎች የሚወሰኑበት ፣ በዚህ ወቅት የሚመጡ ገዢዎችም በፍጥነት ለግዢ የሚወስኑበት ...ለአልሚዎና ለቤት ግብይት ባለሙያዎች የተሻለ የሚባል ወቅት ነው።

🚧የበዓላት ወቅቶች

ከዓመቱ ወቅቶች በተጨማሪ  የበዓላት ወቅቶችም ተጨማሪ ልዩ ግንዛቤ ሊወሰድባቸው የሚገባ የበዓላት ወቅቶች ነው። የበዓላት ወቅቶች ቤት ገዢዎችን የሚባሉትን ሳይቀር የበዓል ዝግጅትና ድባብ ውስጥ የሚከቱ በመሆናቸው እንደሚጠበቀው የበዓላት መዳረሻዎችና የበዓላት ወቅቶች ለቤት ግብይት የተነቃቁ አይደሉም።

የበዓላት ወቅቶች ካለፉ በኋላ ያሉ ወቅቶች የተሻለ የግብይት መነቃቃትን የሚፈጥሩ ናቸው። ለዚህም የሪል እስቴት አልሚዎችና አገበያዮች የበዓላት መዳረሻና የበዓላት ወቅቶችን ቀጥተኛ ከሆኑ የግዢ ጥያቄና ሙከራ ራሳቸውን ገትተው በመዝናኛ ፕሮግራም መልክ የሚጋጁ የተለያዩ መረጃዎችን በመደበኛም ሆነ በማህበራዊ ሚዲያ መልዕክቶችን ቢያስተላልፉ የእንኳን አደረሳችሁ መልዕክቶችን እያስተላለፉ ምርታቸውን በተዘዋዋሪ መንገድ ቢያስተዋውቁ ይመከራሉ። 

መልካም ቅዳሜ!

👨‍⚕ኢ/ር ደሳለኝ ከበደ የሪል አስቴት ቢዝነስ አማካሪ

@etconp