بخصوص اول امتحان ثانوية عاملة داخل في المجموع وأي امتحان بعد كدا
١- اول مادة اساسية هتلاقي الدنيا زحمة وفيه توهان واجهزة تفتيش وتعليمات من كل حتة
ماتخافش من حاجة انت اسد، حاول تروح بدري عشان تخش بدري وماتتوترش
٢- وانت داخل المدرسة هتلاقي اصحابك او اي مجموعة واقفة تراجع مع بعضها ومعاهم ملازم وحاجات جامدة كدا وبيقولوا معلومات غريبة سيبك منهم وماتراجعش معاهم وماتراجعش مع حد الا لو حد بيحضر معاك كل الدروس من اول السنة وعارفه كويس البيست بتاعك يعني وسيب ١٠ دقايق قبل الامتحان ماتراجعش فيهم حاجة خالص ، اشرب مياه وخش الحمام دا مهم جدا
٣- الامتحان هيبدأ هتلاقي ناس بتحاول تغش وتعمل دوشة وناس تانية بتعيط وناس تانية بتتخانق مع المراقبين ومحاضر غش
ماتركزش غير في امتحانك وبس كأنك قاعد لوحدك وامسك اعصابك مهما حصل ومهما كان شكل الامتحان لأنك عامل اللي عليك وزيادة
٤- لو اتيحت ليك فرصة غش
انا بقولك اهو ماتغشش وسيبها على ربنا هيكافئك على دا اوي اوي والله، اقرا السؤال كويس مرتين وبعدين حل وبعدين اقرأه مرة كمان بالحل بتاعه
٥- هتخرج من اللجنة هتلاقي شوية عيال بتراجع واصحابك جايين يراجعوا معاك
ماتراجعش مع حد نهائي وانسى اللي حصل وفكر في المادة الجاية
٦- بعد الامتحان هتلاقي عيال على السوشيال بتقول دا اسهل امتحان في الدنيا ياعم ازاي تغلط فيه، وناس تانية بتقولك كدا احلامنا ضاعت ومش هنلحق حاجة
سيبك من اي كلام لأن الاتنين بيكدبوا وماتفتحش سوشيال بعد الامتحان خالص ولا تكتب بوستات صياح نهائي
٧ - ماتقولش رأيك في الامتحان خالص لأنك ممكن تحبط حد تاني مهما كان رأيك، وفره لنفسك.. منه راحة بال وتوفير وقت ليك كدا كدا رأيك مش هيغير حاجة
٨ - نماذج الاجابة هتنزل الاول من المدرسين وبعدين من النموذج الاصلي بتاع الكنترول
ماتراجعش معاهم نهائي وانسى لأنك كدا كدا مش هتقدر تغير حاجة انت عملت اللي عليك وخلاص
٩- مهما كان اللي عملته في الامتحان انساه خالص انت تعبت وماكانش في ايدك تعمل اكتر من كدا، هتقعد تحسب درجات وربنا هيكرمك بدرجات تانية خالص والله ثق فيه بس واتعب للمادة الجاية عشان ربنا يكرمك فيها
حبيبي كلنا مقدرين مجهودك وتعبك والظروف اللي مريت بيها خلال السنة وفرحانين بيك والله، عملت ايه وهتعمل ايه في الامتحان دي حاجة مش فإيدك ف ماتخافش منها، انت عملت اللي عليك وزيادة، ثق فربنا اكتر، هيكرمك ماتقلقش
❤️-
Dr. Kareem Sayed