"الأمهات الجميلات،،
السيدات الرائعات الاختاروا تجربة الأمومة وفضلوا انو وقتهم يكون خالص لأولادهم أو اضطروا يختاروها،، اتخلوا عن دراستهم أو عملهم في سبيل تحقيق الحضور لأطفالهم ،،

مافاتك شيء،،
ايوه العمل والاستقلالية مهمة،، ايوه بتشبع جزء من أرواحنا وذواتنا بس يا جميلة الجميلات لا تعلو على رسالتك وجهدك المبذول في صناعة الإنسان،، الطفل الانتي بتربيهو في حد ذاته مهمة وخلافة انتي بتعبدي ربنا عبر تربيتك ليه ،، فوجهي النية والعمل لله ،،


ماتحسي إنك متورطة أو عالقة في مكان واحد،، كونك أم دا أعظم مساحة عشان يتسع وعيك وتسكن روحك، كونك أم دي ما قيمة عادية بذات لما تكوني أم مجتهدة مخلصة في أمومتها ساعية للجودة والإحسان لأطفالها ،،
نظمي أولوياتك، سهلي مهامك، وفي وسط زحمة يومك خصصي وقت لنفسك ،، اتعلمي تشحني طاقتك وتستردي قوتك عشان تقدري تواصلي بدون تذمر، سخط، أو إحباط ،،

أمومتك دي القيمة الوحيدة التي لا يمكن استبدالها، ممكن تُستبدلي كزوجة، كسيدة عاملة، كسيدة أعمال، كطبيبة ناجحة، إلا أمومتك لطفلك لايمكن استبدالها. دا دور خُصص ليك بالاسم من فوق سبع سماوات وأنعم ربنا عليك بشرفه، ومن هنا مفترض تدركي مدى أهميتك وعظمة مايمكنك فعله ،،

ركزي في نعمك أدواتك وفرصك، واختاري تتطوري إنسانياً، انشغلي بمعرفة ذاتك واكتشفي قدراتك وهبات ربنا ليك. تقدري تستقلي ماديا لو حبيتي وتصنعي نجاحك من داخل بيتك،، ما تركزي مع منو عمل شنو دفعتك وصلو وين ،، منو عايشة حياتها ومستمتعة ومنو عملت نجاح مهني وكل يوم في مكان. ماتهدري لحظاتك القيمة وانتي بتربي اولادك في الحسرة على فرصك التانيه،، لأنه الحسرة بتحبط الهمة وحتخسري طاقة طيبة انتي وهم محتاجنها،، كمان حتحسي كل شيء حولك بيتآمر عليك ويقلل من قيمة عطائك ورسالتك،،

تاني بكرر ليك مافاتك شيء و بأي شكل من الأشكال. كلنا بوجودنا في اللحظة دي بنفوت لحظات تانية،، اختيارات تانية ،، في أماكن وعوالم تانيه،، بس الأهم النحن بنعملوا في عالمنا الواقعي والآني يكون معمول بإخلاص محبة وحضور،،

ما تخجلي تعرفي نفسك بكونك أم ومربية ولا تسمحي لغيرك يشعرك بالنقص ،، ماتقللي من أهمية أمومتك أمام أي رسالة ومهمة أخرى مهما بدت لعينك عظيمة ،،

مارسي أمومتك بشكل صحي وصحيح،، اخلصي واتعلمي عن التربية واحتياجات طفلك وأفضل وسائل التعامل معاهو وتنشئته،، حوليها من روتين لعظمة كما يليق بها،، اهتمي أنك تكوني صحيحة نفسيا وتختاري انتي وشريكك تعيشوا بوعي و سوا تبنوا علاقة صحية وبيئة صحية وآمنة - ودا أول واجبات الأمومة والأبوة -

ولو كانت تجربة أمومتك الخالصة فترة مؤقتة أو طول العمر – تذكري صناعة الإنسانية فكراً وشعوراً هو التعمير الحق"

- رشا درويش