👉ኢትዮጵያ በዋሽንግተን ዲ.ሲ ባካሄደችው ስኬታማ የፋይናንስ ማፈላለግ መድረክ፣ ለታላቁ የቢሾፍቱ ዓለም አቀፍ አየር ማረፊያ ፕሮጀክት ከአሜሪካ መንግሥት ተቋማት፣ ከዋና ዋና የፋይናንስ ተቋማት እና ከታላላቅ የዘርፉ ኩባንያዎች ጠንካራ ድጋፍ ማግኘቷ ተገለጸ።

ይህ ስምምነት ከአፍሪካ ግዙፍ የአቪዬሽን መሠረተ ልማት ፕሮጀክቶች መካከል አንዱ የሆነውን ይህንን አየር ማረፊያ እውን ለማድረግ ወሳኝ ምዕራፍ ነው።

ከፍተኛ የአሜሪካ ባለስልጣናት ኢትዮጵያ ክፍት እና በግሉ ዘርፍ ለሚመራ ኢኮኖሚ እያደረገች ባለው የኢኮኖሚ ማሻሻያ አጀንዳ ላይ ያላቸውን ጽኑ እምነት ገልጸዋል።

ለዚህም ሀገሪቱ እያስመዘገበች ያለውን ጠንካራ አጠቃላይ የኢኮኖሚ አፈጻጸም እና አበረታች የእድገት ተስፋን በምክንያትነት አንስተዋል።

የቢሾፍቱ ዓለም አቀፍ አየር ማረፊያ የአፍሪካን ትስስር የሚቀይር፣ የንግድ ፍሰትን የሚያሳልጥ እና ኢትዮጵያን ቀዳሚ የዓለም አቀፍ አቪዬሽን እና ሎጂስቲክስ ማዕከል የሚያደርግ የፋይናንስ አዋጭነቱ የተረጋገጠ እና ከፍተኛ ተጽዕኖ ፈጣሪ ኢንቨስትመንት መሆኑ ተጠቁሟል።

አየር ማረፊያው አፍሪካን ከዓለም አቀፍ የንግድ ትስስሮች ጋር ይበልጥ ያቆራኛል።

ይህ ፕሮጀክት የኢትዮጵያን የኢኮኖሚ ሽግግር በመደገፍ እና ለአሜሪካ ኩባንያዎችና የፋይናንስ ተቋማት ሰፊ የንግድ እድሎችን በመፍጠር የጋራ ተጠቃሚነትን የሚያረጋግጥ ስትራቴጂካዊ የኢትዮ-አሜሪካ የንግድ አጋርነት ነው።

አየር ማረፊያው የረጅም ጊዜ የሁለትዮሽ ግንኙነትን በማጠናከር እና የጋራ የኢኮኖሚ ትኩረቶችን ወደፊት በማራመድ ለሰፋፊ የኢኮኖሚ ትብብሮች እንደ ማዕዘን ድንጋይ ያገለግላል ተብሎ ይጠበቃል።

የገንዘብ ሚኒስትሩ አቶ አህመድ ሽዴ፣ አየር ማረፊያው በአፍሪካ እና ከዚያም ባሻገር ለንግድ፣ ኢንቨስትመንት እና ትስስር እንደ ሞተር እንደሚያገለግል በማጉላት ሲናገሩ “የቢሾፍቱ ዓለም አቀፍ አየር ማረፊያ ዓለም አቀፋዊ ተጽዕኖ ያለው ሀገራዊ ቅድሚያ የምንሰጠው ፕሮጀክት ነው። በዋሽንግተን የታየው ጠንካራ ተሳትፎም በኢትዮጵያ የወደፊት የኢኮኖሚ ጉዞ ላይ ያለውን እምነት አጉልቶ ያሳያል።” ብለዋል።

የአፍሪካ ቀዳሚ አየር መንገድ በሆነው የኢትዮጵያ አየር መንገድ የሚመራው ይህ ፕሮጀክት፣ እያደገ በመጣው የመንገደኞች እና የጭነት ፍላጎት ላይ የተመሰረተ ነው። አየር መንገዱ ከዋና ዋና የአሜሪካ ተቋማት ጋር ያለውን ጥልቅ አጋርነት በድጋሚ ያረጋገጠ ሲሆን፣ ፕሮጀክቱ እየጨመረ የመጣውን ዓለም አቀፍ ፍላጎት ለማሟላት እና ኢትዮጵያ በአቪዬሽን ማዕከልነት ያላትን ሚና ይበልጥ ለማጠናከር ያስችለዋል።

የኢትዮጵያ አየር መንገድ ግሩፕ ዋና ስራ አስፈፃሚ አቶ መስፍን ጣሰው በበኩላቸው “ከአሜሪካ አጋሮቻችን ጋር ያለን ትብብር ለኢትዮጵያ አየር መንገድ ዓለም አቀፋዊ ስኬት ማዕከላዊ ሚና ተጫውቷል። ይህ ፕሮጀክትም በዚሁ ጠንካራ መሰረት ላይ የሚገነባ ሲሆን፣ እያደገ የመጣውን ፍላጎት እንድናሟላ እና አዲስ አበባን ግንባር ቀደም የአቪዬሽን ማዕከል አድርገን እንድናጠናክር ያግዘናል” ብለዋል።

የፕሮጀክቱን የፋይናንስ አቅርቦት በዋናነት በመምራት ላይ ያሉት የአፍሪካ ልማት ባንክ የፋይናንስ ምክትል ፕሬዚዳንት ወ/ሮ ሀሳቱ ንሴሌ የፕሮጀክቱን አዋጭነት እና አህጉራዊ ጠቀሜታ ሲያብራሩ “ይህ ጠንካራ መሰረታዊ እውነታዎች ያሉት፣ አዋጭ እና ከፍተኛ ተጽዕኖ ፈጣሪ ፕሮጀክት ነው። የቢሾፍቱ አየር ማረፊያ ቀጠናዊ ውህደትን ያጠናክራል፣ ተወዳዳሪነትን ያሳድጋል፣ እንዲሁም በመላው አፍሪካ ዘላቂ እድገትን ያፋጥናል።” በማለት ተናግረዋል።

በዋሽንግተኑ ውይይት በፋይናንስ አወቃቀሮች እና የትግበራ መንገዶች ላይ ተጨባጭ መሻሻሎች የታዩ ሲሆን፣ ለትግበራው መፋጠን የሚረዱ እና መፍትሄ ላይ ያተኮሩ ግብዓቶች ተገኝተዋል።

ጠንካራው የአሜሪካ ድጋፍ፣ የግሉ ዘርፍ ከፍተኛ ፍላጎት እና የተቀናጀ የተቋማት ድጋፍ፣ የአፍሪካን ስትራቴጂካዊ እና ትልቅ ምኞት የተሰነቀበትን የአቪዬሽን ፕሮጀክት እውን ለማድረግ የተፈጠረውን ትልቅ ምዕራፍ አመላካች ናቸው።

@etconp