بصي أول حاجة عايزة أقولك إن مش معنى إنك داخلة رابعة وتايهة في التدريب إن فيكي مشكلة فـ لا خالص بجد لأن أغلبنا مش بينزل تدريب أصلا واللي بينزل أول ما نزل كان بيبقى واقف مش فاهم حاجة وحاسس إنه كل الناس فاهمة إلا هو وأنا كنت كدا عموما برضوه😂 فـ بجد الموضوع عادي جدًا متقلقيش.

ومتستنيش إنك تذاكري كل الحالات الأول وبعدين تنزلي، لا برضوه لأن ده عمره ما هيحصل والتدريب أصلًا جزء كبير منه إنك تشوفي حاجات جديدة وتتعلميها هناك، ولو أنتى مش واخدة اورثو لسا فـ برضوه مفيش قلق من كونك مش فاهمة بجد، انزلي في مكان كويس وخلي هدفك في الأول تتفرجي وتفهمي الدنيا ماشية إزاي، مش لازم من أول يوم تمسكي حالة أنتى مع الوقت هتتعودي لأنه أصلا تدريب.

ولو حد قالك ادخلي اتعاملي مع الحالة وإنتى مش عارفة، عادي جدًا تقولي أنا لسه طالبة ولسه بتعلم ومحتاجة أشوف الأول وأتعلم، أصل مفيش حد اتولد بيعرف يعمل assessment أو treatment plan 🙂😂

ابدئي من دلوقتي حتى لو يوم أو يومين في الأسبوع، ولو مش عايزة الاجازة دي عادي جدًا استني الجاية، وكل حالة هتشوفيها ارجعي بعدها اقري عنها واكتبها في نوت عندك، مع الوقت هتلاقي الحاجات بدأت تبقا في دماغك دايما.

وبالنسبة للـ AI، فيه حاجات زي ChatGPT وGemini ممكن يساعدوكي تفهمي الحالة وتفكري في assessment والتمارين المناسبة، لكن متعتمديش عليهم لوحدهم في اختيار التمارين أو العلاج. استخدميهم كأداة مساعدة جنب الكتب والمصادر الموثوقة طبعا وفي مواقع زي دول ممكن تبحثي فيهم:

- https://t.me/Therapedia/393

- https://www.orthopt.org/content/practice/clinical-practice-guidelines

- https://t.me/PT_Abakera/4264

- https://t.me/PT_Abakera/9861

ومتخليش الإحراج أو الخوف يأخرك أكتر من كده، لأن معظمنا أول تدريب بنبقا تايهين ومتوترين، والثقة بتيجي من النزول نفسه مش قبله خالص.🤍