السلام عليكم
للدفعة الجديدة اللي لسة داخلين سنة أولى
عايزة أقولكم إن الأيام دي بتفكرني لما عمي جابلي البالطو هدية السنة اللي فاتت وكنت فرحانة بيه وكدة ودي حاجة طبيعية كأول بالطو وكدة ونزلت بقا عن مدى فرحتي بيه وكدة
المهم في واحدة عندي بعتتلي هي ماكانتش ف الميدكال فيلد أساسا.. كانت في زراعة تقريبا (مش تقليل منها) بعتتلي قالتلي بلاش حماسة البدايات دي البالطو ده أصلا بنستخدمه تلاتة ف واحد مفرش وسجادة وبنصلي عليه وممرمطينه معانا
المهم روحت حكيت لواحدة صاحبتي أكبر مني في بشري قالتلي استمتعي بالأجواء دي لأنها من امتع اللحظات
وقالتلي إنه كان عندهم اورينتيشن كذا يوم كدة قبل الدراسة وحكتلي قد اي ماكانش له لازمة وكذا حد قالها ماتروحهوش بس برضو راحتلها يومين كدة وزهقت وبطلت تروح من نفسها

ونصحتني بكدة برضو قالتلي هو تضييع وقت بس انتي لازم تكتشفي بنفسك ده وتتعودي تجربي بنفسك.. أصله دي تجربتك ومحدش يقدر يمنعك من اللي انتي عايزاه

الشاهد من الكلام ومن الرغي الكتير ده ... ابعدوا عن الناس السلبية واللي كلامها يسم البدن دي
وصاحبوا الناس اللي تشجعكم وتراعي حماستكم ... كونكم سنة أولى حاجة ماتعيبكمش ... اعملوا كل اللي نفسكم فيه ..اتصوروا بالبالطو وجنب اسم الكلية وافرحوا بمنة ربنا عليكم عشان بجد بجد مشاعر سنة أولى دي صعب تحسوها في وقت تاني غير سنة أولى ... والحماسة اللي فيكم دي استغلوها بجد واستمتعوا بيها 🫣♥️

ربنا يفرحكم كلكم ويكتبلكم الخير ويرضيكم ويراضيكم ويحقق أحلامكم في مكانكم الجديد ♥️🥰