كل سنة اشوف عمل عن فطارية اهل الجنوب وجهل اهل الريف حتى يخلون الناس تضحك عليهم

لحد الان ما شفت عمل يتناول سبايكر .. ابشع جريمة مرت بالعراق خلال هاي السنوات

ما شفت عمل يتناول شخصية بكر السامرائي وموقفه الكبير

ما شفت عمل عن اخلاص علي سعد النداوي .. وخطبته المشهورة بالمقاتلين واستنهاض هممهم

محد سولف عن مسلم ابن عقيل .. العفو قصدي عقيل العذاري والخيانة اللي قوبل بيهه

ما شفت عمل عن ركضة اهل الجنوب بذيج الايام الصعبة وجهادهم بالاموال والاولاد

ما شفت عمل عن "سعيّد وسجاد" .. وكلكم تتذكرون الهوسة المبكية "سعيّد بيك اتغطى .. وسجاد عگالي"

ابو تحسين العظيم .. الكارزما المهيبة والهدوء العجيب .. وين تخليده ؟

محد سولفلنا عن روحية محمد رمضان وقصة ايده ورجله اللي انقطعن لاجل العراق "الچف والساگ الطاحن "

محد سوه فلم او مسلسل عن صمود آمرلي القرية الصغيرة المحاطة بالدواعش من كل جانب وكيف كانت نساءهه عظيمات بمعنى الكلمة

محد ذكر ابو مهدي .. القائد الجندي .. اللي كضاهه بالتربان وبرأس الحربة واكف بحيث متميز بينه وبين ابسط جندي

العالم يجذبون حتى يصنعون شخصيات يحتذى بيهه واحنا نجذب حتى ندفن هاي الشخصيات بتاريخنا.

د.حسين البصري