Магистратурада турдош бўлмаган йўналишларга ҳам ҳужжат топшириш мумкин

#abituriyent

2019 йил 17 июндаги Президент қарори билан ўтган йилдан бошлаб магистратурага фақат турдош йўналишларни битирган бакалаврлар ҳужжат топшира олишига оид тақиқ бекор қилинган эди.

Давлат қабул комиссияси жорий йил учун турдош олий таълим йўналишларининг рўйхатини тасдиқлаган.

Рўйхат бу ерда: t.me/xushnudbek/6232

Магистратурада турдош бўлмаган йўналишларга ҳужжат топшириш тартибини яна бир бор тушунтириб ўтмоқчиман. Чунки амалиётда "фалончи йўналишдан пистончига топшира оламанми?", деган саволлар жуда кўп берилади.

Аслида барчаси жуда оддий ва содда.

Рўйхатда 6 та гуруҳ берилган. Биз уларни умумий қилиб қўйидагича гуруҳларга ажратимиз:
1) спорт;
2) мусиқа;
3) тасвирий санъат;
4) санъатшунослик;
5) техноген санъат;
6) соғлиқни сақлаш.

Мана шу юқоридаги 6та гуруҳда турдош таълим йўналишлари учун ҳужжат топширишда қатъий чеклов бор, бундан чиқиш мумкин эмас.

Бундан ташқари яна 6 та алоҳида номдаги йўналишлар саналган, булар:

1) “Чақириққача ҳарбий таълим”;
2) “Хореография (турлари бўйича)”;
3) “Дирижёрлик (турлари бўйича)”;
4) “Режиссёрлик (турлари бўйича)”;
5) “Актёрлик санъати (турлари бўйича)”;
6) “Ветеринария”.

Ушбу 6 та йўналишга ҳам чеклов бор, улар фақат ўзларига мос йўналиш бўйича магистратурага ҳужжат топшира олади холос. Яъни “Дирижёрлик” фақат “Дирижёрлик”ка, “Ветеринария” фақат “Ветеринария”га ва ҳ.к.

Шу жойигача тушунарлими? Демак, хулоса қиламиз: юқорида илова қилинган рўйхатда фақат чеклов қўйиладиган йўналишлар номи саналган.

Ана энди асосий қисмига етиб келдик. Бу рўйхатда йўқ йўналишлар билан нима бўлади?

☝️ЖАВОБ: юқорида номи тилга олинмаган таълим йўналишлари исталган магистратура мутахассисликлари бўйича танловда қатнашиш ҳуқуқига эга. Яъни ҳеч қанақа чеклов йўқ.

Математикани тугатган юриспруденцияга топшира олади.
Физикани тугатган журналистикага топшира олади.
Филологияни тугатган нефть-газга топшира олади.
Ирригацияни тугатган халқаро муносабатлар ва жаҳон сиёсатига топшира олади.

(булар шунчаки мисоллар, ўзингиз хоҳлаган йўналиш номи чиқмаса, бизга мумкинмасми, деб ўйланиб ўтирманг)

Хуллас, тушунтира олдим деб ўйлайман.

✅ Яна бир жойи. Ҳов, тепадаги чекловлар рўйхати бор эдику. Ўша рўйхат фақат "кириш" учун чеклов. Яъни шу магистратура мутахассисликларига ҳужжат топшираётганлар бакалаврда айни ўша йўналишларни тугатган бўлиши шарт. "Чиқиш" учун эса ҳеч қандай чеклов йўқ. Масалан, тиббиётни тугатган юриспруденцияга топшира олади, лекин юриспруденцияни тугатган тиббиётга топширолмайди. Ёки санъатни тугатган иқтисодга топшира олади, иқтисодни тугатган санъатга топшира олмайди. Ва ҳ.к.

🎓 Шунингдек, ўтган йили айрим қабул комиссиялари бошқа турдош йўналишни тугатган абитуриентларга уларни фақат контракт бўйича қабул қилишларини, давлат грантига даъвогарлик қила олмасликларини таъкидлашганди. Аммо бу каби гаплар мутлақо нотўғри. Турдош бўлмаган йўналишни тугатганлар ҳам магистратурада бюджетда ўқиши мумкин. Масалан, иқтисодни тугатганлар журналистикага топширса, фақат контрактда ўқийди, деган гаплар асоссиз.

❗️Эслатиб ўтаман, магистратурага қабул magistr.edu.uz сайти орқали онлайн бўлиб ўтмоқда.


👉 @xushnudbek 👈