‏بعد توصية من احد الاشخاص الجميلين، قرأت كتاب ( الرجال من المريخ، النساء من الزهرة )، واللي يتكلم عن الاختلافات بين الجنسين " الذكور والاناث " وتفكير كل واحد منهم.
‏في البداية، الكتاب كان يتكلم عن وجود اختلاف بين الرجل والمرأة من ناحية الخصائص والصفات، ونتيجة لهذا الاختلاف تحصل الخلافات بين الجنسين وما نكون فاهمين بعض وايش اللي نحتاج له بالضبط. ‏من ضمن هذي الاختلافات هي ان الرجل في العادة يركز في امور مثل القوة، المقدرة، الكفاءة بينما المرأة تركز عادةً في التعاون، الحب، التواصل، العلاقات. ‏احيانًا يحتاج الرجل انه ينعزل عن الناس ويفكر بكل اموره ومشاكله بنفسه، ما يقول مشكلاته لاحد الا اذا كان يحتاج نصيحة. بينما المرأة تحتاج انها تكون مقدرة ومفهومة من اللي تتكلم معه - احيانا لما تتكلم ما تحتاج حل تحتاج بس شخص يسمعها - وبكذا هي تحس بالراحة. ‏اي شيء يمس المقدرة او الكفاءة او الثقة عند الرجل يكون شيء محبط جدا بالنسبة له. مثل لما المرأة تحاول تحل كل مشاكله وتتدخل في شؤونه وتشكك في قدرته على التعامل معها بنفسه. ‏في المقابل، اي شيء يمس الاهتمام او التفهم او المشاعر عند المرأة يكون شيء محبط بالنسبة لها. مثل لما الرجل يكون غير مهتم ولا مبالي للمرأة اذا تكلمت عن مشاعرها واللي تحس فيه. ‏لما الرجل يقول مشكلاته فهو بالعادة يحتاج الى حلول بينما المرأة لما تقول مشكلاتها فهي بالعادة تحتاج لمستمع يتفهمها ويفهم الظروف اللي تمر فيها اكثر من ايجاد الحل، وأي تقليل لمشاكل المرأة او مشاعرها مع الوقت يؤثر عليها سلبيًا بشكل قوي نفسه نفس لما يكون التقليل بقدرة الرجل والثقة فيه.


‏رأيي عن الكتاب؟ جميل جدًا وممتع لما تعرف الفوارق هذي واللي تعرفك احيانا عن نفسك والاسباب اللي تخليك تسوي تصرفات معينة. ولكني اشوفه مناسب اكثر للمقبلين على الزواج لانه بيفيدهم جدًا بمعرفة خصائص شريكهم وايش الطريقة اللي يتعاملون معه فيها، ‏اللي كتبته هو جزء قليل جدا من حول 400 صفحة، ولا يعتبر مختصر الكتاب لان الكتاب يقدم لك كل شيء بالتفصيل وايش الصفات الموجودة في كل جنس وايش هي المشكلات الشائعة اللي تحصل نتيجة للاختلاف بين الجنسين وطريقة تفكيرهم وغير هذا...