​​Заковат — 20 ёшда!

2001 йил 25 март куни, бундан роппа-роса 20 йил олдин Заковат интеллектуал кўрсатуви илк марта эфирга кетган эди.

20 йил эфирда қолиш осон иш эмас, бу фақат гапиришга осон, бунинг машаққатини тушунганларгина билади. Эҳҳе, бу давр ичида не-не синовларни, кўтарилишу, тушишларни кўрмадик.

2004 йил сентябрь ойида академик лицейда 2-босқичда ўқирдик. Ўшанда илк марта Заковат остонасини ҳатлаб, билимимни синаш учун келганман. Ва шундан буён Заковатнинг сеҳрли оламида қолиб кетдим. 17 йил турли жумбоқларга ечим топиш учун бош қотириб юрибман. Аслида ҳаётимизнинг ўзи сиру синоатларга, ечилиши керак бўлган бошқотирмаларга тўла. Ана шу ҳаёт йўлимда ҳам Заковат менга жуда ва жуда асқатмоқда.

20 йилдан буён Заковат клуби бир неча минглаб билимдонлар тайёрлади, яна бир неча юз минглаб ёшлар қалбида илм олиш учун рағбат ва қизиқиш уйғотди. Ва умид қиламанки, Заковат ҳали яна узоқ вақт илм шуъласини тарқатишда давом этади.

Буни қарангки, бугун, ўзининг 20 ёшлик туғилган кунида, Заковат интеллектуал клуби Самарқанд шаҳрида катта интеллектуал тадбир ўтказмоқда. Бунда ҳам балки мажозий маъно бўлса керак.

Шунча йилдан буён Заковатни кузатаётган барча мухлисларга чексиз миннатдорлигимизни билдирамиз!

P.S.: суратда Заковатнинг илк ўйинида ўйнаган илк жамоа аъзолари: Зебо Шомирова, Ҳабибулло Ражабов, Бахтиёр Каримов ва Дилшод Саъдуллаев. Яна бир аъзо Собиржон Қодиров афсуски расм тушган пайтимиз йўқ эдилар.

Илк ўйнаган жамоанинг ёрқин вакили ва менинг Заковатдаги илк кумирларимдан бири Фарҳод Акбаров афсуски 2017 йили вафот этган эди. Жойлари жаннатдан бўлсин, илоҳим.


👉 @xushnudbek 👈