طگيت كمامة n95 وياها چفوف وعقمت ورحت لمجلس العزاء الحسيني ( مسجد الإمام علي الهادي عليه السلام) في حي الجامعة
وصلت لگيت مسوين طابور للدخول ولزمت سره بالتباعد الإجتماعي
لكيت ٢ شباب واحد بيهم صيدلاني
واحد لازم بيده محرار يقيس درجة الحرارة
والثاني بيده جهاز أوكسيميتر ( نسبة الاوكسجين بالدم)

المهم بعد الفحص طلبوا نزع كمامتي والچفوف وإستبدالها بجديدة منهم
گتلهم يمعودين هاي جديدة
گالوا ميخالف إحنا لسلامتكم لازم كمامة جديدة وتحت انظارنا
جزاهم الله خير الجزاء انطوني جديدة
وراها دخلوني لجهاز تعفير الجسم الكامل بمادة الفارگون

المهم عبرت هاي المراحل وكان كل همي أحصل على مكان بالمجلس مثل ما تعرفون العدد جدا محدود
ومنعوا دخول الاطفال وكبار السن من اجل سلامتهم
الحمد لله حصلت مكان واقرب مسافة بيني وبين الشخص الاخر ٢ متر والمسجد معفر بشكل كامل

ما اريد الإطالة اكثر ، بس حسيته أكثر مكان أمان من ناحية الإجراءات الصحية مقارنة بكل ما موجود من الدوائر الحكومية والكوفيات وملاعب كرة القدم والمولات والاسواق والاماكن العامة

مو هنا السالفة ، السالفة قبل لا يصعد الخطيب، صعد دكتور شاب إنطه تعليمات صحية ووقائية كجزء من مجلس العزاء

الشكر لسماحة الشيخ عقيل علي الزبيدي وشباب المسجد الابطال المثابرين لخدمة سيد الشهداء

#سنحييها 🤚