Мустақил дарс: биринчи ва иккинчи даражадаги қариндошлар кимлар?
Кўпчилик прописка мавзусида гап кетса, қонунда тилга олинган
биринчи ва иккинчи даражадаги қариндошлар кимлар, деб савол беради. Ҳозир ушбу саволга жавоб бермоқчиман.
Аслида бу саволга жавоб беришим жуда осон. Шунчаки, фалончи-фалончилар десам, бўлди. Аммо келинг, яхшиси ушбу саволга
мустақил равишда қандай қилиб жавоб топиш мумкинлигини ҳам тушунтириб кетаман. Умид қиламанки, ҳозир айтганларим келгусида бошқа шу каби саволлар пайдо бўлса, имкон қадар ўзингиз жавоб топишингизга ёрдам беради.
Google деган қидирув тизими ҳақида яхши билсангиз керак. Хуллас, қайсидир саволга жавоб қидирмоқчи бўлсангиз, аввал шу сайтдан сўраб кўринг. Унинг билмаган нарсаси кам.
Демак, биз ҳозир
биринчи ва иккинчи даражадаги қариндошларга кимлар киришини билмаяпмиз. Буни аниқлаш учун қуйидаги ишларни қиламиз:
1️⃣-қадам: Google.com сайтида
«биринчи ва иккинчи даражадаги қариндошлар» деб қидирувга (поиск, search) берамиз. Шунда қуйидаги натижалар чиқади
(1-расмга қаранг).
2️⃣-қадам: чиққан жавобларни бирин-кетин ўқиб кўрамиз. Энг тўғри келадиган саҳифалар одатда энг тепада чиқади. Биринчидаги сайтни очиб кўрамиз
(2-расмга қаранг). Бу саҳифада айнан
савол-жавоб кўринишида маълумот берилган экан. Ва жавобнинг биринчи хатбошисидаёқ
кимлар тўғри шажара бўйича, кимлар ён шажара бўйича, кимлар биринчи, кимлар иккинчи даражали қариндошлар эканлигига аниқ жавобни ўқишингиз мумкин. Агар синчиклаб, диққат билан ўқисангиз, барчаси қонунчилик бўйича тўлиқ тушунтирилган.
3️⃣-қадам: янада ишончли бўлиши учун чиққан жавоблар орасидан 2-ўринда турган Хоразм вилоят адлия бошқармасининг сайтидаги маълумотга ҳам кириб кўрамиз. У ерда ҳам биз қидираётган саволга жавоб берилган
(3-расмга қаранг).
4️⃣-қадам: яна ҳам қўшимча маълумот керак бўлса, унда
қонуннинг ўзидан ўқиб кўрамиз. Юқоридаги маълумотларда
Оила кодексининг 57 ва 58-моддаларида қариндошлик ҳақида қоидалар борлигини билиб олдик. Энди Оила кодексини очиб кўрамиз. Бунинг учун яна бизга Google ёрдам беради ва биз
«Оила кодекси» дея қидирувга берамиз
(4-расмга қаранг).
5️⃣-қадам: биринчи чиққан таклифни, яъни
Lex.uz порталидаги ҳаволани босиб, Оила кодексини очамиз ва
қариндошлик ҳақида янада кўпроқ маълумотларни
расмий манбадан ўқиб оламиз
(5-расмга қаранг).
✅ Хуллас, кўриб турганингиздек
«биринчи ва иккинчи даражадаги қариндошларга кимлар киради?» деган саволга
ҳеч кимнинг ёрдамисиз, мустақил равишда узоғи 5 дақиқа ичида жавоб топа олдик. Бунинг учун озгина ҳафсала қилсак ва бироз интернетда ишлаш кўникмасига эга бўлсак кифоя.
❓Саволнинг жавобига келсак, қариндошлар
тўғри ва
ён шажарага бўлинади. Тўғри шажаранинг ўзида
даражалар бор.
Тўғри шажара бўйича
биринчи даражали қариндошлар –
ота-она ва фарзандлар;
Тўғри шажара бўйича
иккинчи даражали қариндошлар –
бобо-буви ва набиралар.
Доимий рўйхат (прописка) масаласида гап кетса, мана шу қариндошлар тушунилади.
Тошкентда пропискаси бор фуқаролар
ака-ука ёки опа-сингилларини пропискага олиб кира олмайдилар, чунки улар тўғри шажарага кирмайди (бу ҳақда Google чиқариб берган маълумотларда ҳам ёзилган).
‼️Маслаҳатим: Google ёки шу каби қидирув тизимларидан фойдаланиб туринг, шунга кўникинг. Маълумотларни мустақил излаш, топиш, таҳлил қилиш, солиштиришга ўрганинг. Бу мушкулингизни анча осонлаштиради. Саломат бўлинг.
👉 @xushnudbek 👈
