​Айтганча, бугун тестда қизиқ иш бўлди: "шпаргалка" билан қўлга тушдим

Тонгда туриб, тестга бориш арафасида абитуриент рухсатномасини чоп этмаганим эсимга тушиб кетди. Чунки тестга бориш ҳақида кеча тунда бир қарорга келгандим.

Кейин шоша-пиша компьютерни ва принтерни ёқдим, рухсатномани юклаб олдим. Шошганда лаббай топилмайди, деганларидай, рухсатномани чоп қилай десам, бўм-бўш оқ варақ топилмай қолди. Кейин ноилож иш столим устида турган дуч келган қоғознинг орқа томонига чоп қилишга мажбур бўлдим.

Тестга бордим. Биринчи постдан ўтдим. Иккинчи постдан ўтдим. Учинчисига келганда текширувчилар рухсатномамни қарашди. Орқасидаги ёзувларни кўриб, "нима бу?" деб сўрашди. "Шунчаки черновикка чиқаргандим" дедим хотиржам оҳангда. Шу пайт текширувчи "Черновикмас, шпаргалка-ку бу" деб қолса денг.

Кейин мундоқ қарасам, эрталаб шошилинчда рухсатномамни "Заковат" турнири учун тайёрланган савол-жавоблар чоп этилган қоғознинг орқасига чиқарган эканман. Бутун варақ савол-жавоблардан иборат эди😂

Оббо, буниси неча пулдан тушди энди, деб тургандим, хайрият, кузатувчилар таниб қолишди, "Заковат"ни саволларими дейман" дейишди. "Ҳа, шунақа, бўш варақ тополмай, шошилиб шунга чоп қилгандим" дедим.

Хуллас, ўтказворишди. Фақат рухсатномамни ўзлари билан олиб қолишди. Постда турган Миллий гвардия ходими паспортимни олиб, тезда бошқа янги рухсатнома чиқартириб, олиб келиб берди.

Шунақа гаплар. Сал қолса, "шпаргалка" билан қўлга тушиб, акт тузиб, тестдан четлаштирилиб кетардим😄


👉 @xushnudbek 👈